KA-mut ilaasortanngornissamut kajumissaarut

Atuakkamik saqqummersitsi-simasut, taalliortut, nutserisartut aamma atuakkiaminnik saqqummersitsiniarlutik suliaqartut, kajumissaarniar-pavut KA-mut ilaasortanngoq-qullugit.

Ilaasortaaneq ukiumut 400 kr-niinnaqarpoq, ilinniartunut utoqqalinersialinnullu 200 kr-niinnaqarluni.

Apeqqutigineqartarpoq ilaasortanngoruma suut uannut iluaqutaassappat?

KA-p siunertai aajuku:

§ 2. Siunertai: Kalaallit atuakkiortut, taalliortut aamma kalaallisuumut nutserisartut kikkulluunniit piginneqqaartussaanermik inatsisitigut illersugaasut tapersersussallugit pisinnaatitaaffiisigullu illersussallugit.
Imm. 2. Ilaasortat soqutigisaat pisariaqartitaallu assigiinngitsut isumagissavai.
Imm. 3. Atuakkiortut, taalliortut kalaallisuumullu nutserisartut sulinerat oqilisaanniarlugu aningaasaateqarfimmik pilersitsissalluni".

Iluaqutissartaa sumiippa?

1) Suliamik piginnittuuneq.

KA-ip ukiuni 45-ini atuunnermini atuakkiortup, nutserisup, taalliortullu, assitalersuisartullu suliaminik piginneqaartuu-nerata ataqqineqarnissaa illersugaraa. Imaappoq anersaakkut - tigussaanngitsunik kulturikkut pilersitsinermi - piginnittuunerup ataqqineqarluni, aningaasarsiartaqarpallu eqqortumik akilerneqarluni atorneqartarnissaa KA-p suliaani pingaarnerniipput.

2) Isummersorsinnaatitaaneq

Killilersugaanngitsumik isummersorsinnaatitaanerup oqaaseqarsinnaatitaanerullu illersorneqarnera.

Tassaniipput peqatigiiffeqarnitsigut illersukkavut. Nunatsinni kikkulluunniit killilersorneqaratik isummersorsinnaatitaanerisa (atuakkiorsinnaatitaanerisa) illersortuarneqarnissaa.

Taakkua saniasigut peqatigiiffeqarnitsigut nunatsinni atuakkiortarnerup atuarumatussutsillu siuarsartuarneqarnissaat sullisigiuarparput, pikkorissaatitsisarnerit isumasioqatigiissitsi-sarnerillu aqqutigalutigit.

Pikkorissaasarnerit isumasioqatigiissitsisarnerillu ingerlannissaannut aningaasassarsiortarneq aaqqissuunnerilu KA-p siulersuisuisa ingerlattarpaat, ilaasortanullu neqeruutigisarlugit, ilaasortat immikkut aningaasartuuteqaratik peqataaffigisinnaasaat.

Kalaaleq

KA-mut ilaasortaanernut atatillugu atuagassiaq Kalaaleq, ilaasortanut akeqanngitsumik pisartagarilersinneqartarpoq.

GreenLit

Alloriarneq tulleq maanna alloriarfigilerparput, tassa KA-p ataani Nunatsinni Atuakkialerinermut Allaffik - GreenLit - pilersittussanngoratsigu.

Nunatsinni atuakkiortarnerup siuarsarneqarnera atuarusussutsillu annertusarnera GreenLit-ip ataavartumik suliarilissavaa. Aammali atuakkiat nunatsinneersut nunani allani nittarsaanneqarlutik, saqqummersitsisartut suleqatigalugit piginneqaartuuffiisa tuniniarneqartarnissaa suliarissavaa.

Imaappoq GreenLitsip suliassai tassaapput nunatsinni atuakkiat pitsanngorsaavigineqartuarnerat aqqutissiuutissallugu aamma atuakkiat nunatsinneersut nunani allani soqutigineqarnerulernissaat sulissutigis-sallugu.

Peqatigiinneq nukittuunngortitsisarpoq

Kalaallit Atuakkiortut ilaasortaat amerlaneruppata, KA-p suliniutai pisortanit aamma politikerinit tusaaneqarnerunissaat qularinngilarput.

Atuakkiortut, atuakkiorusuttullu tamatta soqutigisaqaqatigiinnerput tassaniippoq.

Oqaluinnartoqarsinnaanngilaq atuakkiorniartarnermi, saqqummersitsisarnermilu pissutsit ajorpallaartut, peqatigiiffimmullu ilaasortaanissaq soqutiginagu.

Aatsaat KA-mi peqatigiikkutta atuakkiornerup silarsuaani pissutsinik ilorraap tungaanut saatitsisinnaavugut.

Atuakkiortut ataasiakkaat KA-mut ilaasortaanermikkut, KA-p isumasioqatigiissitsisarnerini pikkorissaatitsisarnerinilu peqataasarnermikkut sunniuteqaqataasinnaapput. Ulluinnarnilu siulersuisunik isummersueqataasinnaallutik.

Ataatsimeersuarnissaq tulleq

KA ukiut pingasukkaartumik ataatsimeersuartarpoq. 2015-miilli ukiulli tamaasa pikkorissaanernik isumasio-qatigiissitsisarnernillu ilaasortaminut neqerooruteqartarluni. Ilaasortat angalanissaat, ineqarnissaat, nerisaqarnissaallu KA-mit akilerneqartarput.

KA-p ataatsimeersuarnissaa isumasioqatigiissitsinissaalu tulleq pissaaq, Sisimiuni

30 juli - 1 august,2020. Knud Ramussenip Højskoliani.

KA-p ilaasortaatut ataatsimeersuarnermi taasisinnaatitaallutit peqataasinnaavutit.

Ilaasortaanermut akiliut KA-p kontuanit Grønlandskbanken 6471 7659803-mut akilerneqartarpoq.