Ataatsimeersuarneq 2017

Kalaallit Atuakkiortut siulersuisui tamarmik qinigaaqqittut.

Kalaallit Atuakkiortut (KA) sapaammi 12 november ataatsimeersuarnerminni siulersuisunut 2014-miit -2017-mut ilaasortaasimasut tamaasa qineqqippaat. Tamanna pivoq qinigassanngorteqqittut ersaattaanneqarlutik qineqqinneqarnerisigut. Taamatut qinersineq pisinnaalerpoq siulersuisunut ilaasortat tamarmik sinniisussarlu siulleq peqatigiillutik qinigassanngoteqqinniarlutik nalunaaruteqarnerisa malitsigisaanik.

Siulertaasumut Juaaka Lyberth, unammillerteqarani, qinerneqaqqippoq, siulersuisunullu ilaasortat, Kirstine K. Olsen (siulittaasup tullia), Sørine Steenholdt (aningaaserisoq), Tupaarnaq Rosing Olsen (allatsi) aamma Juâna Petrussen, kiisalu sinniisussaq siulleq Markus E Olsen, qinerneqaqqillutik. Siniisussap aappaatut siullermeerluni qinerneqarpoq Nukaaka Berthelsen.

Siulersuisut tamarmiullutik sassaqqinnerannut siulittaasunngoqqittup Juaaka Lyberth tunngavilersuilluni ilaatigut ima oqarpoq: "siulersuisoqatigiinni sulinerput nuannareqaarput, suleqatigiilluaqalutalu. 2014 augustimi qinigaaqqaaratta suliassat aallartitavut suli naammasseqqajanngillat, annertoqingamik, ataatsimeersuartullu pisinnaateqqikusuppatigut sulinerput ingerlateqqinniarlugu siulersuisoqatigiinni isumaqatigiilluta sassaqqipugut".

Kalaallit Atuakkiortut ataatsimeersuarnerminni isumaqatigiillutik politikkikkut anguniagassat 2018-2022 oqaaseqaatitut saqqummiuppaat qulequtaqartut "atuakkiornermut politikki ullutsinnut naleqqussagaq pisariaqalerput".

Anguniakkatut suliniutissat oqaaseqaatigineqartut KA-p nittartagaani atuarneqarsinnaapput.

Kalaallit Atuakkiortut ukiut pingasukkaarlugit ataatsimeersuartarput. Ukioq manna ataatsimeersuarneq sioqqullugu 10 november unnukkut tamanut ammasumik café atuakkialeriffik ingerlanneqartoq ornigarneqarluaneqaqaaq, aqaguani malitsigisaanik KA-mut ilaasortat atuakkiornissamullu soqutigisaqartut allat pikkorissaqatigiinneq, milittakkanik avitseqatigiinnertut aaqqissuussaq, iluatsilluartumik ingerlaneqarluni.